09/05/21

PORQUE, POR QUE OU PORQUÉ?

Esta entrada está destinada a coñecermos os usos de porque, por que e por qué. Para facermos un uso adecuado cómpre saber que:

Porque: pode ser a) unha conxunción causal 'por causa de': Non irei ao espectáculo porque teño moito traballo; b) conxunción final 'para que': Vén a Galicia porque adora nosa paisaxe e cultura e c) conxunción concesiva 'aínda que': Porque ti o digas, non vou levar o paraugas á rúa.  

Por que: pode ser a) a unión da preposición por + pronome relativo que: A ordenanza por que nos rexemos neste concello poden solicitala en versión electrónica; b) preposición por + pronome interrogativo que: Non sei por que non te atopei.

Finalmente, por qué é un substantivo que expresa 'causa, motivo': Gustaríame saber o por qué da túa ausencia.

Agora só nos falta poñer en práctica estas indicacións!

20/02/21

TERMOS ESENCIAIS DE VACINAS

Novamente a Área de Terminoloxía do Servizo de Normalización Lingüística da USC pon ao noso dispor, en liña, unha relación de 125 rexistros relacionados co ámbito das vacinas baixo o nome Termos esenciais de vacinas, que están aloxados no coñecido bUSCatermos. Esta compilación de voces complementa a publicada hai uns meses baixo o nome Termos esenciais da Covid-19.

Nesta ocasión os 125 rexistros están relacionados co ámbito das vacinas, as súas tipoloxías e as campañas de inmunización, como se indica na nota explicativa que acompaña a publicación. Amais de cada voz achégase a área ou áreas temáticas na cal se inscribe, os nomes polos que se coñece en galego, español e inglés e, en case todos os casos, ofrécese a definición en galego.

Finalmente, cómpre destacar que a selección do corpus se realizou tendo en conta as Follas de información de vacinas do Servizo Galego de Saúde ademais doutros recursos como Terminologia de les vacunes, Vaccination glossary e Vaccine&Immunization.

28/12/20

TERMOS ESENCIAIS DA COVID-19

O ano 2020, marcado pola pandemia da Covid-19 (si, con xénero feminino), xerou a necesidade de nomear en galego novos conceptos que ata o momento non tiñan denominación. 

Este traballo abordouno Xusto Rodríguez Río dende o Servizo de Normalización Lingüística da Universidade de Santiago baixo o título Termos esenciais da Covid-19 . Trátase dunha longa listaxe de case 200 termos, que remiten á ficha correspondente no bUSCatermos, ofrecidos en tres linguas (galego, español e inglés) e inscritos dentro da área sanitaria e epidemiolóxica.

Dende esta bitácora dámoslle os parabéns ao seu autor por un traballo tan necesario nos tempos que corren.

17/05/20

FELIZ DÍA DAS LETRAS GALEGAS 2020: Ricardo Carvalho Calero (1910-1990)


Imaxe de Luis Davila

28/03/20

UNHA PROPOSTA TEATRAL: SHAKESPEARE PARA IGNORANTES

Como non todo vai ser traballar nestes tempos de confinamento, velaquí deixo o vídeo completo da exitosa obra teatral Shakespeare para ignorantes, dirixida por Quico Cadaval e levada a escena por Mofa&Befa. Unha comedia de carácter didáctico na cal un profesor ofrece unha conferencia sobre Shakespeare para instruír a un público carente de coñecementos. A retranca e o riso están presentes en toda a obra.

Vaivos gustar!

20/03/20

UN AGASALLO PARA OS OÍDOS... "NO SALÓN DAS CEREIXAS" DE XABIER DÍAZ & ADUFEIRAS DE SALITRE

Velaquí queda a peza "No salón das cereixas" pertencente ao último disco de Xabier Díaz e Adufeiras de Salitre titulado As catedrais silenciadas. Desfrutádea estes días que nos toca quedar na casa e temos máis vagar.


15/03/20

#DÍGOCHOEU

Comezamos o ano 2020 cunha nova ferramenta que, de seguro, vai axudar a mellora o uso da lingua galega, tanto oral coma escrita. Trátase duns pequenos vídeos elaborados polos xornalistas Carlos Amado e Esther Estévez baixo o cancelo #Dígochoeu que permitirán resolver as dúbidas máis frecuentes que se presentan á hora de usar o galego.

Premendo na imaxe podedes visualizar a entrevista que lles fixeron aos xornalistas no programa A revista da CRTVG.


A seguir recollemos a relación de vídeos #Dígochoeu que se gravaron ata o momento coa finalidade de que vos sexan útiles e pasedes o tempo nestes días caseiros que nos esperan. Intentaremos actualizalos acotío:





FICAMOS NA CASA


Imaxe de Leandro Lamas

12/01/20

GALICIA NOMEADA: UN PROXECTO DE MICROTOPONIMIA COOPERATIVA 

A riqueza toponímica de Galicia é ben coñecida por todos e por todas, de feito a macrotoponimia (ou toponimia maior) está recollida no Noménclator de Galicia. Con respecto aos microtopónimos (ou topónimos menores), estes son moi abundantes na nosa sociedade e, por desgraza, moitos deles acaban desaparecendo ao existiren unicamente na memoria das persoas de máis idade. Para evitar isto, o Seminario de Onomástica da Real Academia Galega puxo en marcha unha interesante ferramenta dixital chamada Galicia Nomeada, que nos permite rexistrar a microtoponimia e divulgala entre toda a sociedade. 

Galicia Nomeada ofrece unha versión para escritorio e unha aplicación para móbiles (Android e iOs) que nos permiten xeoreferenciar os nomes do territorio da contorna elixida e acompañalos de fotografías, textos e gravacións coa pronuncia, lendas asociadas ou descricións, segundo se indica na páxina do proxecto.

Os nomes das leiras, fontes, montes, penedos, regos, camiños, entre outros, funcionaron e, nalgúns casos, aínda seguen funcionando como localizadores xeográficos e forman parte dun patrimonio de gran riqueza que sería unha mágoa que se perdese.




05/01/20

O PORTAL DA CIENCIA GALEGA:  GCiencia

Dende o mes de novembro do ano 2013 temos a sorte de contar coa páxina GCiencia, que une xornalismo e divulgación e achega a ciencia e a tecnoloxía que se fai en Galicia a toda a sociedade. Faino dun xeito sinxelo botando man de tres linguas: o galego (maioritariamente), o castelán e o inglés. Este proxecto está capitaneado polos xornalistas Eduardo Rolland e Pablo López, baixo a editora Ciencia Galega Industrias Creativas S.L., e conta con numerosos premios e recoñecementos dende que se puxo en marcha; entre eles o prestixioso premio Prismas 2019.

Organízase nas seguintes seccións: Ciencia, Mar, Natura, Universidade, Tecnoloxía, Nautas, Tolociencia, Destinos, aos que se unen Opinión, Talento, HistoriasGC, Pontenciencia, Perspectivas, Premio Comunicación Científica, Xacementos, GCEnglish, Ecocidade e Boísimo, dedicada á gastronomía. Ademais, conta coa canle GCTV.

Ata o momento, as xestións dixitais no ámbito da administración foron o tema de dúas publicacións polo xornal GCiencia: As xestións dixitais dos galegos coa Xunta xa superan as presenciais e As novas tecnoloxías mudan a cara da Administración.
Dende aquí desexámoslle unha longa vida a GCiencia e animamos á súa lectura!